(*)அச்சுத் தாயின் முதற் குழந்தை இந்தச் செய்தித்தாள். (*) ஒரு கையில் தேநீர், மறு கையில் செய்தி.. இரண்டுமே சுடச் சுட இருப்பது தான் அதிகாலை ஆனந்தம். (*) ஒரே நாளில் உயர்விழந்துப் போகும் இவை நிரந்தரமின்மையின் நிதர்சனம். (*)செய்தித்தாள்களுக்குப் பின்னால் இருக்கும் உழைப்பாளர்களின் எண்ணிக்கை, செய்திகளிலிருக்கும் எழுத்துக்களின் எண்ணிக்கையை ஒருவேளை ஒத்திருக்கக் கூடும். (*) பேருந்து, ரயில்களில் இரவல் வாங்கப்படும் பத்திரிகைகள் 'செய்திகள் எல்லோருக்கும் பொதுவானவை' என்பதை சூசகமாய்ச் சொல்லும். (*) செய்திகளுக்கு மட்டுமானதல்ல இந்தச் செய்தித்தாள்கள். இன்றைய செய்தித்தாள்கள் இனி நாளை முதல்.. (*) ஓர் ஏழை மாணவனின் புத்தக உறையாக.. தெருவோர தேநீர்க்கடையில் வடையிலிருந்து எண்ணெய் அகற்றும் வடியாக.. முன்பதிவில்லா புகைவண்டிப் பெட்டிகளில் விரித்து அமரும் பாயாக.. சில்லரை மளிகையில் சர்க்கரை மடிக்கும் சுருளாக.. (*) இன்னும் பலவாக.. இரண்டாம் முறையாய் பயன் தந்து மரித்து மக்கிப் போகும். --அதிரை என்.ஷஃபாத்
தினசரிகள்
நலமில்லா நவீனமும்.. உழைப்பில்லா உடல்களும்
(*) மின்னிலே சுழன்றிடும் மிக்ஸியின் ஆட்சியில் மண்ணிலே புதைந்தன அம்மியும் குளவியும்.. (*) அறவை மில்களின் ஆற்றலின் உதவியால் உரலும் உலக்கையும் உதவாக் கரைகளாம்.. (*) ஆயத்த மாவினில் ஆப்பமும் தோசையும்.. ஆட்டு கல்லுக்கு அலுவலும் இல்லையாம்.. (*) குடங்கள் சுமந்து கொண்டு வந்திட்டார் குடிநீர் ஒருகாலம்!! குழாய்கள் இப்போது. (*) அறிவீர் ஓருண்மை.. ஆதியில் சொன்ன கருவிகள் மாறின கடைசியில் பலனென்ன? (*) மறைந்த அம்மியில் கரங்களின் வலிமையும் உரலின் மறைவினில் உரமான தேகமும் (*) குடைகல்லின் மறைதலில் விரல்களின் வீரியம் குடங்களின் மறைதலில் கொடியிடை மேனியும் (*) கூடவே மறைந்ததை குறையல்ல! வரமென்றோம் மாடர்ன் உலகுக்கு மாறுதல் பலமென்றோம்.. (*) அறிவியல் வளர்ச்சியில் யாவுமே நடந்திடும் துரிதமாய்..அங்ஙணம் மரணமும் வரின்? (*) குறைவாய் உழைப்பும் கூடுதல் உணவும் நிறைவாய் சேர்க்கும் நீள்பிணி நம்மில்.. (*) உண்ணுதலொத்த உடலுழைப்பும் உழைப்பிற்கேற்ற உணவுகளுமே முன்னவர் சொல்லிய முறை ஆகும்.. (*) விகிதம் மாறா விதம், உடல்பேணிடும் சகிதம்வாழ, நம் அகவை சதமென்றாதல் சாத்தியமே ---அதிரை என்.ஷஃபாத்
இதற்கு குழுசேர்:
இடுகைகள் (Atom)